Qurban Qurbanov Nərimanın gedişindən danışdı – “Adam özündə deyildi”
“Qarabağ”ın baş məşqçisi Qurban Qurbanov futbolçusu Nəriman Axundzadənin ABŞ təmsilçisi “Kolumbus Kreu” klubuna transferindən danışıb.
“Qafqazinfo” xəbər verir ki, o, bu barədə Misli Premyer Liqasının 19-cu turunda “Şamaxı”ya 2:1 hesabı ilə qalib gəldikləri matçdan sonra fikirlərini bildirib:
“Nərimanla bağlı ciddi danışıqlar gedir. Sona yaxınlaşırdı. Düzdür, tam qərar verilməyib, amma ola bilər. Bu gün də oyundan sonra futbolçulardan biri mənə yaxınlaşıb dedi ki, yaxşı təklifim var. Siz getməyim və ya qalmağım haqqında nə qərar verəcəksiz, bilmirəm. İnanın ki, bunları əla almaq, əldə saxlamaq asan deyil. Bir az sakitləşdirməyə çalışırıq, başqa xəbərlər gəlir. Xoşagəlməz deməzdim, amma elə təkliflərdir ki, ora ancaq pula görə getmək olar. Elə pul da təklif edirlər ki, oyunçular “yox” deyə bilmir. Ona görə bir az problemlərimiz var. Çalışırıq ki, əla alaq, motivasiyanı saxlayaq”.
Qurban Qurbanov Bəhlul Mustafazadənin Çin klubuna transferinin baş tutmamasından danışıb: “Orda bir neçə detal oldu. Onunla danışmışdıq və Bəhlulun tərəfində idim. Bəzi detallar var, çox dərinə getmək istəmirəm”.
Təcrübəli mütəxəssis Nərimanın ABŞ klubunu seçməsinə münasibət bildirib: “Onun kimi futbolçunun komandadan ayrılması xoş deyil. Amma məlum məsələlərə görə legioner həyatı yaşamaq istəyirdi. Fikrimcə, bu Nərimana lazım idi. Çünki adam özündə deyildi. Hər gün fərqli düşüncədə, fərqli fikirdə idi. Yəqin ki, hər gün haqqında nəsə oxuyub gəlirdi. Getməyi lazımdır ki, özünü tapsın. Buna görə belə addım atdıq. Bəli, mənə lazım idi. Sıx qrafikə bu cür oyunçulara ehtiyac var. Edəcəyimiz bir şey yoxdur. Təki alınsın. Son iki ildə çox əziyyət çəkib. İnanıram ki, daha yaxşı Nəriman görəcəyik”.
